ni'o sai ci mo'o nu binxo

ni'o ci pi pa mo'o nu ritli

.i la .susan. mutce xanka .i ku'i sy zmadu ganse lo ka lenku .i sy peisku lu mi zmanei lo nu daspo lo taxfu li'u .i sy zutse ne'i lo mutce pluja ke makfa djine noi prina le loldi be le makfa kumfa .i la .stefen. pu stidi lo nu sy dasni no da .i ri'a bo lo nu binxo lo blupinxe cu rinka lo nu zenba lo ni te sluji .i se ri'a bo lo taxfu cu da'i se daspo .i ku'i le loldi cu mutce lenku .i .o'o cu'i sy jinvi lo nu lo nu lo taxfu cu fanta lo nu vasxu cu cumki .i ku'i mutce to'e nelci lo nu lenku

ni'o la .stefen. dunda fi sy fe lo tolklina dakli noi kunti gi'e cusku lu ko pilno ti lo nu da'i nai do ba vamtu .i lo nu do pofygau le djine cu xlali do li'u .i sy cusku lu xlali rinka ma li'u ju'e lu la'a do denpa ze'u lo cacra be li so'o lo nu mi facki do .i le munje poi do ba zi vitke cu darno ti .i ji'a ju'o lo fekcrida ca'o lo nu vitke cu cpedu lo nu do cliva le djine .i ko tinbe .i ku'i ko mutce kurji le djine li'u ju'e lu vi'o sai .stefen. li'u

ni'o la .stefen. co'a sanga je tavla fi lo nu litru vau la .gliban. .i sy smadi lo du'u cy tavla lo fekcrida .i se ki'u bo na pilno la .lojban. .i cy cusku so'o da noi na mutce cinri .i se ki'u bo sy krici lo du'u cy menli gasnu lo makfa .i ji'a la'a lo nu tavla cu se clite gi'a sidju fi lo nu cy pensi .i cy cusku ze'a lo mentu be li du'e .i sy ca'o mutce lenku .i ku'i ba bo le kumfa cu canci .i sy na'e cai jundi lo lenku

ni'o sy po'o nenri le djine .i le djine cu se bartu lo tcetce barda kumfa .i za'a cai le kumfa cu marji se cimde du'e da to va'i li za'u ci toi .i lo te jorne be lo kamju .e lo simsa greku dacti vu'o po le kumfa cu fe'e di'i se jganu lo na cumki be le te munje be sy .i ji'a sy zgana lo nu so'i greku dacti cu .ii sei rigni se'u jmive gi'e cunso sligau .i le menli be sy na kakne lo nu jimpe le stura be le kumfa .i se ri'a bo sy mulno lo ka viska cfipu .i se ri'a bo sy ze'a vamtu .i ku'i .e'e ru'e sy vamtu ne'i mo'i le dakli

ni'o ca bo sy tirna lo voksa se cu'u lo glico panra be lu mi pu di'i pensi lo du'u xu kau lo re mei cimde prenu cu simsa gasnu ca lo nu vitke le munje be do li'u .i sy ba lo nu vamtu cu sisku lo tavla .i sy re'o lo darno pe'a bitmu cu viska lo tcetce barda stizu .i sy smadi lo du'u ri mitre li xa lo ni clani .i ku'i le stizu cu fe'e di'i na zasti ne'i lo ci mei cimde .i se ki'u bo sy na'e sai birti .i .ui sy snada co rivbi lo nu za'u re'u vamtu .i sy smaji cusku lo panra be lu mi na djuno li'u gi'e za'u re'u catlu le kumfa .i ri manku gi'e vasru so'o fagri tansi to lo du'e mei cimde fagri cu mutce ke cinri je manci toi .e so'i jmive noi sy na pu viska .i ji'a sy tirna lo jelca sance .i ku'i ri simlu lo ka mutce darno vau sy .i ji'a sy tirna lo sance be lo cmalu jmive to so'i ri simsa lo jukni .i ku'i lo skapi .e lo rectu cu simsa lo danlu .e nai lo cinki toi .i lo jmive sance lo ka .ii tcetce jibni cu simlu sy .i sy catlu lo se diklo be le stizu .i sy viska re fagri gerku poi lamji le stizu gi'e mutce bard a .e lo .y. brabra jmive

ni'o le jmive noi cpana le stizu cu traji lo ka barda vau fo ro jmive poi sy pu viska .i le jmive cu li'a zasti ne'i du'e cimde .i ji'a le jmive cu ponse du'e sai tu'urbirka .i ri di'i muvdu pa'o lo to'e cumki canlu .i sy za'u re'u snada lo nu na vamtu .i le jmive cu cusku lo panra be lu ko cliva le djine li'u .i la .susan. se minde gasnu

ni'o le jmive cu cusku lu xamgu .i do tsali .i mi pu terpa lo nu do fenki? binxo li'u .i ku'i sy na tirna le selsku .i ji'a sai sy na tirna ne'i le menli .i lo curve ke sidbo je se cinmo cu menli tolcanci .i le se lifri cu tcetce cizra sy .i ku'i sy ca'o troci lo nu virnu .i se ki'u bo troci lo nu menli cusku lu mi troci .i ku'i le do munje cu tcetce cizra mi li'u ju'e lu .ue do sutra cilre .i mi nitcu lo nu catlu le do menli .i ko curmi la'e di'u .i jo nai do ba cortu li'u

ni'o sy ganse so'i morji spisa .i ro ri sutra tolcanci gi'e ba zi canci .i le se lifri cu mutce cizra gi'e ku'i na to'e se nelci

ni'o ba bo le jmive cu cusku lu bancu lo ka xamgu .i mi na kakne lo nu jImpe so'i se lifri be do .i ku'i mi nelci so'e da poi mi jimpe .i mi djica lo nu vitke do .i da'i mi friti lo nu jarco le menli be mi do .i ku'i ju'o sai la'e di'u cu rinka lo nu do fenki binxo .u'u sai .i ri'a bo do na pu lifri lo nu catlu lo drata menli .i ta'o nai xu do djica lo nu mi vitke do li'u

ni'o sy ca'o lenku gi'e mutce terpa .i ku'i ji'a sy ca'o djica lo nu kalte la daspo fekcrida .i sy pu zgana lo du'u lo blupinxe cu zmadu vo'a lo ka vlipa .i sy ca'o djica lo simsa vlipa .i se ki'u bo sy menli cusku lu mi djica .i ji'a mi ca bredi li'u .i se mu'i bo le jmive cu sanli to sy peisku lu .u'e sai bramau lo pu se krici li'u toi gi'e cadzu fa'a sy .i le jmive ca lo nu jgari sy cu cusku lu ju'o do ba cortu li'u

ni'o lo blupinxe cu mutce tolnelci lo nu skicu le nu binxo .i mi ca sinma la'e di'u .i se ki'u bo mi ciksi fi do lo nu je'a mutce cortu po'o

ni'o sy ca lo nu cikna binxo cu viska lo nu so'i cmalu jimve cu lacpu le xadni be le jmive fa'a lo manku .i ji'a sy .ua nai cai viska lo nu so'i selfu danlu cu bevri le xadni be vo'a fi'o pu minde vo'a .i sy ze'i krici lo du'u vo'a fenki binxo .i ku'i la .tsist. sidju lo nu surla binxo .i sy menli cusku lu xu mi ba di'i krici lo du'u lo se pensi be do cu se pensi mi li'u ju'e lu .oi mi mutce pacna lo nu na go'i .i mi ji'a na nelci le se lifri li'u ju'e lu .yyy. xu do pu zbasu su'o blupinxe li'u ju'e lu na go'i .i ze'u ca ro djedi lo ni remna cu banro .i se ni'i bo lo ni blupinxe cu ji'a banro .i se ni'i bo ro lo pu blupinxe zbasu cu ca vitke pa remna li'u ju'e lu .oi .ii ru'e mi na pu pensi la'e di'u li'u

ni'o .a'i sai sy sanli gi'e xruti le djine .i sy cortu ro sluji to ba za ku sy facki lo nu so'a sluji cu banro se la'u lo centre be li so'o .i mu'a .ii nai le cnebo djine cu banro se la'u lo centre be li bi .i sy ckire fi lo nu lunbe kei te cu'u la .stefen. toi .i ku'i sy mutce kurji le djine .i sy ba zi lo nu sanli ne'i le djine cu ganse lo barda nejni poi le vitke cu pilno ke'a lo nu xruti le munje be sy

ni'o lo ny cy cmima ba lo nu sy xruti cu gasnu lo nu sy dasni lo pastu .i ji'a gidva sy lo ckana .i sy ze'u sipna

ni'o ci pi pa mo'o nu jibri gunka

.i sy mutce jai lerci fai lo nu tolcliva le jibri dinju .i sy na gunka ca lo purlamcte .i ku'i sy krici lo du'u da'i lo nu sy na gunka ca le cabycte cu rinka lo nu le jatna cu fengu binxo .i sy na cpedu lo nu da po ny cy gasnu lo nu sy cikna .i ku'i sy na kanpe lo nu sy sipna ze'u lo cacra be li ji'i re no

ni'o loi barja badgau ca lo nu sy tolcliva cu cusku lo se du'u sy mutce na'e simsa se jvinu .i se ki'u bo sy cusku lu mi pu zi di'i sai repcreze'a lo sluji li'u to li'a ro bajra prenu cu na pilno la .lojban. .i se ki'u bo mi na tcita lo glico selcku ne'i le dei lisri pagbu toi .i lei badgau cu cusku lo se du'u li'a sy snada .e le se du'u la'a sy na nitcu lei no'a

ni'o lo drata blupinxe cu jai kajde sy lo nu gunka ca le cabdei .i ku'i sy terpa lo nu le jibri jatna cu fengu .i sy na djica la'e di'u .i zo .djan. cmene le jatna .i sy milxe nelci la .djan. .i ku'i ri di'i fanza gi'e jai frili fai lo nu fengu binxo .i dy cisma rinsa sy ca lo nu sy nerkla le dinju .i sy surla binxo mu'i lo nu dy na fengu sy lo nu lerci .i za'a so'u da .ui denpa la .terisas. noi drata ke barja selfu .i sy sutra cadzu te zu'e lo nu sidju ty

ni'o ty ca lo nu sy tolcliva cu cusku lu .u'i do na nitcu lo nu bajra .i za'a so'u da cpedu lo se pinxe li'u .i sy noi surla vasxu cu cusku lu mi na bajra li'u ju'e lu .ia nai lo nu do pu zi klama ti le vorme cu zmadu fi lo ka sutra kei fe ro nu lo badgau cu sezmuvgau ca lo nu ri fengu .i ta'i ma do gasnu va'o lo nu do na bajra li'u .i sy cusku lu mi smadi lo nu mi milxe bajra li'u gi'e peisku lu .oi mi na morji lo nu bajra .i mi na slupli vasxu li'u .i le jmive cu cusku lu li'a sai li'u se ri'a lo nu sy se spaji ke cmalu plipe gi'e ku'i rivbi lo nu falgau lo se pinxe poi sy ca'o zbasu .i le jmive ca'o cusku lu do ponse lo cnino xadni .i ri se kai lo ka tsali gi'e sutra gi'e certu cu pilno lo nejni .i lo nu da'i do na djica lo nu lo drata cu zgana lo nu do cizra cu mukti lo nu do jitro lo se cinmo be do .i lo nu do mutce djica lo nu sutra sidju cu rinka lo nu do tcetce sutra cadzu li'u

ni'o di'a munje .i sy ca'o lo nu le jmive cu cusku cu zgana ro sruri do'e lo nu na muvdu .i sy krici lo du'u sy kakne lo nu klama ge le bajra le vorme gi le vorme le bajra so'o roi ku pu lo nu lo drata cu kakne lo nu pa roi vasxu .i le jimve cu cusku lu na go'i .i le besna .e nai le xadni pu zi sutra binxo .i le xadni cu sutra .i ku'i .u'u na simsa sutra li'u .i sy ca la'e di'u za'u re'u lifri lo nu le munje cu se fanmo

ni'o sy lerci zgana lo nu la .terisas. cusku fi sy .i se ki'u bo sy cusku lu .u'u sai mi pu na jundi li'u .i ty cusku lu xu do kanro .i do simlu lo ka cizra ca le cabdei li'u ju'e lu mi kanro .i ku'i mi pu ze'a lifri so'i da poi cnino li'u ju'e lu ma cmene li'u ju'e lu .ua nai ma kau cmene ma li'u .i ty milxe darxi sy gi'e cusku lu lo nanmu poi do nelci .i do pu simsa toljundi ca lo nu do nelci lo cnino nanmu po'o li'u ju'e lu .u'i mi nelci no cnino nanmu to le jmive ca cusku lu .u'i xu jetnu li'u .i ku'i sy za'o na jimpe lo krinu toi .i ku'i .y. mi .y. pu za .y. co'a xe draci lo makfa cfika .i ju'o cu'i mi dukse pensi le draci li'u ju'e lu .ui sai do ze'u nitcu lo na'e jibri cinri li'u

ni'o le re selfu cu smaji gunka .i le barja dinju cu vasru so'i se selfu .i se ki'u bo pi so'u roi zifre lo nu casnu .i ba za bo lo remna cu snuti janli lo pinxe bevri .i se ri'a bo le bevri .e le pinxe cu co'a farlu .i la .susan. cu mutce djica lo nu lo se pinxe na farlu vau mu'i lo nu la'a sy ba lumci .i se ki'u bo sy pu lo nu xamgu pensi cu klama le bevri gi'e jgari ri .e le pinxe .i sy dunda le se pinxe le bevri gi'e zgana lo nu so'a re'o remna cu smaji gi'e viska catlu sy gi'e mutce se spaji .i se ki'u bo sy cusku lu mo li'o .i le bevri cu cusku lu lo ni do pu zi sutra cu na cumki li'u .i sy za'u re'u lifri lo nu ro da se fanmo .i le jmive cusku lu .u'i ru'e ba'a do nitcu lo jmina temci te si'u lo nu finti lo te spuda li'u ju'e lu ki'e .y. do .i ta'o ma cmene do li'u ju'e lu .y. mi na jimpe li'u ju'e lu .y. ca lo nu da casnu tu'a do vau da cusku ma poi tcita do li'u ju'e lu mi ba'e na kakne lo nu jimpe la'e di'u .i .y. la'a di'e sidju .i ro mi'a menli cusku se ki'u lo nu na pilno lo valsi li'u ju'e lu . ua .i'a .i mi jimpe li'u

ni'o ba zi bo sy gasnu lo nu za'u re'u cfari gi'e cusku lu mi pu pilno lo makfa tcica poi le mi famti cu ctuca mi li'u .i lo re'o remna cu smaji cusku lu .ia nai banli tcica li'u .i ku'i sy toljundi lo nu go'i vau gi'e klama le trixe be le barja .i la .terisas. smaji cusku lu mi na djuno lo du'u ta'i ma kau do pu gasnu .i ku'i mi stidi lo nu do na za'u re'u gasnu lo simsa li'u .i sy xanka cusku lu vi'o sai li'u

ni'o pa po'o fasnu poi cinri cu fasnu ca le cabycte .i sy ca lo nu pa remna goi ko'a cu tolclite jgari pa drata remna cu jai lafti ko'a loi kerfa gi'e se desku ko'a .i ba zi bo lei badgau cu gidva ko'a tu'a le bartu .i so'i remna cu krici lo du'u le fasnu cu cizra .i ku'i lo go'i cu gleki gi'e mutce sinma la .susan. .i sy cpedu so'i cidja lo jukpa gi'e citka ca'o lo ve vimcu be fi le nicte .i ji'a sai citka ci snuji ca lo nu xruti le zdani .i ba bo sy mutce tatpi sipna

ni'o ci pi ci mo'o nu facki

.i ca le bavlamcte sy na jibri gunka .i la .deivid. ca'o lo nu sy citka ci jipci cu stidi lo nu sy rapcreze'a lo nu pilno lo cnino denci je jgalu .i sy cusku lu .y. .ia do pu cusku lo se du'u no da pilno ri li'u ju'e lu no da di'i pilno .i ku'i pi so'u roi ku le sampu xarci cu vajni .i no da kakne lo nu lebna li'u ju'e lu do xamgu drani .i mi rapxreze'a fo ma li'u ju'e lu mi stidi lo nu do vitke la solji vorme panka gi'e dasni lo mutce tagji gi'e denpa lo nu da troci lo nu xairgau do li'u ju'e lu .u'i .ia nai ru'e do stidi ma lo nakni blupinxe li'u ju'e lu .u'i mi stidi lo nu vitke lo panka gi'e dasni lo xekri gi'e denpa lo nu da troci lo nu xairgau lo ninmu li'u ju'e lu .ua .i ku'i xu do terpa lo nu mi ca'a se xairgau binxo li'u ju'e lu na'e sai go'i .i xu do terpa li'u .i sy ca lo nu ba'o pensi cu cusku lu na go'i li'u

ni'o lo te nuzba cu ba ze'a te preti fi lo se du'u ta'i ma lo cilce je vlile gerku bende cu nergau lo panka .i loi pulji cu krici lo du'u lo remna cu catra le nanmu vau .e ku'i lo du'u le nanmu cu pu so'i roi bapli gletu su'o ninmu .i se ki'u bo loi pulji cu gleki pinxe do'e le catra gi'e nai ciksi fi lo te nuzba

ni'o no da poi cinri cu fasnu ba ca'o ji'i pa jeftu .i ba bo ku'i sy lifri lo mutce cizra

ni'o sy jibri gunka so'u da mu'i lo nu so'u remna cu vitke le barja mu'i la'a tu'a lo jeftu midju .i .ue sai le jmive cu cusku lu ta poi nanmu cu se jitro lo banli bradi li'u .i la .susan. menli cusku lu xu ri du la daspo fekcrida li'u ju'e lu go'i .i ko spogau ta li'u .i ji'a sy cinmo lo ka traji fengu .i ku'i sy jimpe lo du'u le cinmo cu se krasi le jmive .i se ki'u bo cusku lu mi na ca go'i .i la'a ta na djica lo nu se jitro .i ji'a la'a ta snuti jarco lo diklo be lo jitro li'u ju'e lu .y. ju'o na djica lo nu se jitro .i ko viska catlu le gapru trixe canlu li'u .i sy ja'a catlu .i ku'i facki no da poi cinri gi'e cusku .i le jmive spuda cusku lu .ua sai .uu sai mi pu tirna lo se du'u lo remna cu se jinzi no makfa .i ku'i mi na pu krici .i ku'i li'a sai drani .i mi sidju li'u .i .ue cai sy no'e klina viska lo jmive poi lasna le trixe be le nanmu .i le jmive cu viska simsa lo -starfish-? .i ku'i sy krici lo du'u lo jukni simsa jmive poi sy viska ne'i lo drata munje cu mintu le trixe jmive .i le menli jmive c u cusku lu do drani .i ji'a .o'o nai do drani le du'u mi'o nitcu lo nu na ca catra ti .i mi troci lo nu denpa li'u

ni'o sy catlu le nanmu ca'o le nicte .i le nanmu cu simlu lo ka badri gi'e xanka vau sy.i ji'a ko'a di'i tavla ko'a .i sy menli cusku lu xu le nanmu cu cusku fi le jmive li'u ju'e lu na go'i .i .y. sa'e lo nu go'e cu cumki .i ku'i le jmive na kakne lo nu tirna .i la'a le nanmu cu fenki gansu li'u .i la .terisas. zgana lo nu sy di'i catlu le nanmu kei gi'e te preti .i sy lo nu le nanmu cu pu zekri lebna fi sy cu ciksi la .terisas. poi stidi lo nu fonta'a lo pulji .i ku'i sy lu mi na djica .i ku'i mi mutce djica lo nu mi po'o .y. tavla je'u nai te cu'u ta li'u .i ty milxe cisma gi'e cusku lu da'i la'a mi stidi lo nu ko ko kurji .i ku'i mi na gasnu .i ki'u bo ju'o do kakne la'e de'u li'u ju'e lu ki'e .terisas. xu do kakne lo nu do po'o barja selfu ca lo nu mi jersi ta li'u ju'e lu go'i li'u

ni'o ba za bo le nanmu cu sutra sanli .i ku'i lo nu sanli cu na fadni gi'e na simsa lo sanli tadji be lo fadni remna ba'e .e lo xalka se jitro remna .i simsa lo -puppet-? poi se jitro lo to'e certu .i le nanmu cu cizra je to'e certu gasnu lo nu punji lo jdini lo jubme gi'e cadzu fa'a le vorme .i sy pencu ty poi .i'o zei sezymuvgau .i se ki'u bo sy co'a jersi le remna

ni'o .ue ru'e le remna na pilno lo vecnu karce .i ku'i ve'u cadzu .i ba za bo le jmive cu cusku lu la'a le trixe jmive cu na jimpe lo vecnu karce .i le sidbo cu mutce cizra lo se munje be mi .i je'u cfipu mi ji'a ni'o .a'o sai do na platu lo nu gunta lo jitro be le trixe jmive se cau lo sidju li'u ju'e lu mi na birti .i ku'i mi ca smadi lo du'u lo ralju jitro cu mutce ckape li'u ju'e lu mi na kakne lo nu birti pu lo nu mi'o jibni klama .i ku'i la'a mutce ckape .i la'a lo jitro cu ralju fekcrida li'u ju'e lu mi na jimpe li'u ju'e lu lo ralju fekcrida cu traji lo ka vajni je vlipa kei gi'e jitro lo drata fekcrida gi'e xadni simsa mi .i mi'a jamna lo ralju ke daspo fekcrida po'o .i lo drata cu se minde sonci ra'u nai li'u ju'e lu .ii sai mi ba kurji li'u

ni'o ba za bo sy viska lo nu le remna cu klama lo barda zdani poi diklo lo -part of town-? .i se mu'i sai bo sy sutra klama le ny cy dinju te zu'e lo nu ciksi lo fasnu be le cabycte lo drata blupinxe

ni'o ci pi ci mo'o nu gunta

.i sy ca lo nu tolcliva le dinju cu mutce xagji .i ku'i na tatpi gi'e ja'a xagji .i ta'o sy pi so'u roi tatpi ba lo nu blupinxe binxo gi'e ku'i pi so'a roi xagji .i ta'o nai sy klama le citka kumfa gi'e cpedu lo bakni ke cutne bongu .i la .djen. cu cusku lu xo mei li'u ju'e lu .y. ji'i vo no li'u ju'e lu ko ze'a denpa li'u .i dy cliva

ni'o ca lo nu sy citka vau la .stefen. cu vitke le jubme poi sy pilno .i sy skicu le pu za fasnu .i cy cusku lu mi gleki lo nu do pu na nenri .i ku'i mi terpa lo xabju be le zdani poi do pu viska .i so'e blupinxe cu ca kalte .i se ki'u bo mi stidi lo nu ma'a gunta le zdani ca le bavlamcte .i xu do kakne lo nu sidju ca ri li'u ju'e lu go'i li'u ju'e lu xamgu .i pe'u .susan. ko dunda pa bongu mi li'u

ni'o ba bo lo blupinxe cu bende binxo .i la .deivid. .e la .kim. cu djica lo nu pa mei kalte ca le cabycte .i ku'i lo cumki ke ralju fekcrida cu mukti lo nu ro blupinxe cu sidju .i sy zgana lo nu le drata kalte cu simlu lo ka terpa se me'a lo nu kalte le ctino .i sy te preti la'e di'u .i la .deivid. spuda fi lu lo ralju fekcrida cu mutce zmadu la ctino lo ka vlipa .i ku'i mi'o ba na troci lo cnino je kajde tadji be lo nu daspo .i so'a mi'o pu damba lo ralju fekcrida .i se ki'u bo se slabu lo daspo tadji li'u .i sy milxe cisma gi'e cusku lu .i ri ba'e mo li'u

ni'o ze'i denpa fo lo nu la .axmed. co'a cladu cmila .i se ki'u bo ro lo drata cu ji'a cmila .i ba bo la .deivid. cusku lu li'a mi'a pu kusru do se zu'e lo nu na kajde do pu lo nu gunta le ctino .i mi mutce xenru .i mi ca ciksi lo tadji be lo nu daspo lo ralju fakcrida .i ku'i ko sanji lo du'u la'a cu'i ba'e na daspo fekcrida .i lo drata cu kakne lo nu jitro la jukni fekcrida li'o sai li'u

ni'o le karce cu tolcliva lo jibni be le zdani .i ro blupinxe cu sutra plipe fi le karce .i loi ro blupinxe cu girzu preja fa'a ro da .i la .deivid. ca lo nu birti lo du'u no da zgana le bende cu gidva ri lo nu klama le zdani .i vy kakne lo nu tcetce smaji sezymuvgau .i sy sinma la'e di'u .i ku'i na kakne lo nu simsa gasnu .i sy peisku lu ku'i la'a mi ba di'i repcreze'a li'u

ni'o le bende cu tolcliva lo korbi be lo brabra makfa djine .i cy cisma gi'e cusku lu ti poi djine cu za'a sruri le zdani .i se ni'i bo la'a le zdani ba'e na vasru su'o ralju fekcrida .i ri na nitcu lo makfa djine .i doi .kim. ko zbasu lo spoja tutci gi'e punji ri lo cpana be le djine li'u .i cy ca lo nu ky zbasu cu so'o roi sanga cusku lu smaji simsa lo smacu .i mi'a pagre li'u gi'e sinxa sligau lei birka .i le jmive cu jarco lo makfa fasnu sy .i za'a cy gasnu lo cmalu fenra be le djine makfe .i le jmive cusku lu la'a sai ma'a pagre le fenra se cau lo nu le djine jitro cu zgana to ze'a denpa toi .i cy drani .i lo ralju fekcrida no roi pilno lo simsa .i la'a mi va'o lo nu na menli vitke cu cadzu pagre ti gi'e na jundi li'u

ni'o le bende ca lo nu cy minde cu sutra pagre le djine .i ba bo sy dunda le spoja jitro tutci cy .i le bende cu klama le zdani .i vi bo viska le nanmu poi sy jersi .i vy smaji klama le trixe be le nanmu gi'e pilno lo dikca tutci lo nu le nanmu cu to'e sanji binxo .i sy ba cusku lu xu le jitro cu zgana lo nu to'e sanji li'u .i vy cusku lu la'a na go'i .i lo jukni fekcrida cu to'e mencre .i la'a le jitro cu minde ti lo nu facki lo cnino remna .i ku'i ti ba ze'a troci co gasnu lo nu le remna cu cikna binxo .i ba bo ti mu'i lo nu na viska lo cnino remna ba na jai gau kajde le jitro li'u

ni'o le bende cu nergau le zdani .i ne'i lo pa moi kumfa le tolcitno ninmu cu lumci lo loldi se pi'o lo bukpu .i la .raitcel. cu terpa bacru gi'e cusku lu le bukpu .ii .uu cai li'u .i sy zgana lo nu le bukpu cu vasru lo ciblu .i ji'a le xance be le ninmu cu mutce ve xrani .i le ninmu cu klaku .i le ninmu ca lo nu viska le bende cu cusku to za'u re'u ku lo se zdani cu cusku bau na'e bo la .lojban. .i mi na jarco lo drata bangu noi cmima la .gliban. jo'u la .sanban?. toi lo'u .oi le le le ba'e DACTi na curmi lo nu mi sisti kei lo nu le xance cu co'a ciblu cupra .i pe'u cai do ko sidju le'u .i la .deivid. cusku lu .ai mi'a sidju .i mi'a ba zi catra le jitro be le dacti .i ku'i mi'a nitcu lo nu spaji .i le jitro cu diklo ma li'u ju'e lu .ui cai ko catra le xarju malgletu .i ri nenri le gapru traji kumfa li'u .i le ninmu ca lo nu tavla cu no roi denpa fo lo nu lumci .i sy krici lo du'u la jukni cu na curmi .i sy ca lo nu na jibni le ninmu cu cusku lu mu'i ma do'o na terpa lo nu la jukni cu jai kajde le jitro li'u .i vy cusku lu ju'o le ta jukni cu minde fi lo nu lumci rinka po'o gi'e nai sisku lo gunta li'u ju'e lu .u'i sai .ui la jukni ju'e sai to'e mencre li'u ju'e lu go'i .i ku'i la'e di'u na sidju do va'o lo nu da'i sai la jukni cu pencu do li'u .i di'u mukti lo nu sy smaji binxo

ni'o le bende cu facki je pilno lo sarlu serti .i ba zi bo zvati pa vrogai be le kumfa poi traji lo ka gapru ne'i le zdani .i ro se bende cu jgari lo xumjimcelxa'i .i vy tikpa le vrogai se ri'a lo nu daspo .i ro le se bende cu se spaji lo se vasru be le kumfa

ni'o le kumfa cu vasru lo makfa grana .e lo makfa djine .e lo xumki .e lo makfa tutci jubme .e lo botpi be lo rigni litki .i ro le se bende cu tolspaji la'e ba'e di'u .i ku'i ji'a le kumfa cu vasru pa stizu .i pa nanmu noi ju'o du le jitro cu cpana le stizu .i le palku be le jitro cu sruri le jamfu be jy .i ji'a pa ninmu cu moklu sakci le pinji be jy .i le ninmu cu mutce sutra sakci gi'e cladu cinse cmoni .i ji'a sai le ninmu na sisti ba lo nu le vrogai cu se daspo .i ku'i ba zi bo le jitro cu catke le ninmu .i sy zgana lo du'u le ninmu cu ponse no denci gi'e peisku lu .ua nai ti na banzu lo nu cirko lo denci kei lo nu ti ca'a citno to'i cmalu denpa toi .i .ua sai le jitro cu minde fi lo nu vimcu lo denci mu'i lo nu cinse nelci .i mi ba catra le go'i li'u .i .ii sy zgana lo du'u le ninmu cu klaku gi'e simlu lo ka mutce djica lo nu di'a sakci .i sy peisku lu le jitro cu gasnu ma .o'o nai sai poi se xlali ti li'u

ni'o le jitro cu cusku lo glico panra be lu doi -mentally ill-? do kanpe lo nu ta'i ma jinga fi mi ne'i le ralju ke makfa stuzi po mi li'u .i ku'i la .stefen. ca lo nu go'i co'a cladu cmila .i ro da poi nenri le kumfa cu se cfipu je se spaji catlu cy .i ba zi bo le jitro cu makfa sligau le birka gi'e cusku bau lo cizra .i ca bo cy cusku lu doi .kim. ca gasnu li'u .i se ki'u bo ky pilno lo cradi tutci se ri'a lo vu spoja poi porpi le brabra makfa djine .i le flira be le jitro cu mutce kandi binxo .i ji'a cy minde sy la'e lu doi .susan. gau ko sutra porpi fa le bongu be ti poi dakli lo kalci lo skapi li'u .i se mu'i bo sy mutce gleki .i le jitro cu co'a za'u re'u gasnu lo makfa .i ku'i sy pu lo nu pa valsi cu se bacru cu popygau pa birka li vo .i sy pu no roi sezymuvgau fi'o se sutra lo simsa .i ba zi bo ro ralju bongu be le jitro cu porpi se mu'i lo nu sy mutce cisma .i cy cusku lu la'a ti na ba gasnu lo makfa .i sy tugni .i ga'a sy lo nu le jitro cu gasnu lo makfa cu se sarcu lo nu da'i ra sisti lo nu cladu cmoni fi lo ka cortu .i sy krici lo du'u la'e di'u na zi fasnu

ni'o cy cusku lu ta'o mi pu to'i sy na jai frili fai lo nu tirna cy ri'a lo cortu cmoni toi cmila mu'i de'e .i mi pu sruma lo nu ti se sidju la daspo fekcrida gi'o nai mipri lebna la jukni la daspo fekcrida .i ku'i mi pu zi viska ta to'i cy zgagau pa makfa djine toi poi munje litru tutci li'u .i le ninmu ca'o klaku gi'e troci lo nu klama le jitro .i vy jgari le jukni po le ninmu .i ba zi bo le jukni cu co'u jgari le ninmu gi'e troci lo nu rivbi vy .i vy cisma fa'a sy poi li'a cfipu .i vy cusku lu mi jgari re lo ci vasxu tubnu .i .u'i sai .ui li'u .i le ninmu ze'i de'a klaku .i ku'i bo ba zi di'a klaku .i ku'i lo klaku sance cu simlu lo ka ba'o zenba lo ka kanro kei kei sy .i vy jarco fi la .susan. .e la .kim. fe lo tadji be lo nu vimcu la jukni gi'e skori rinju le jukni gi'e cusku fi le jitro fe lu ko minde ro jukni se jitro lo nu klama ti kei se mu'i bo lo nu da'i mi curmi lo nu do ba jmive li'u .i sy fengu catlu vy noi toljundi sy .i le jitro cu tugni sinxa gasnu .i ba zi bo le lumci ninmu cu tolcliva .i s y troci lo nu vimcu le jukni gi'e snada .ui sai gi'e skori rinju .i le lumci ninmu cu jgari sy gi'e klaku gi'e so'i roi cusku lo se du'u ckire sy .e lo drata

ni'o ba zi bo le bandu nanmu cu tolcliva gi'e cusku lu mi pu viska do ne'i le barja li'u sy .i ky vimcu le jukni .i se ki'u bo vy cusku fi le jitro fe lu xo jukni na diklo li'u ju'e lu .y. .i pa .i le mi drata bandu nanmu cu ca'o klama ti .i ku'i darno li'u ju'e lu mi ba za lo cacra be li pi mu cu catra do mu'i lo nu da'i lo ro moi cu na tolcliva li'u .i le kanla be le jitro cu simlu lo ka mutce barda binxo vau sy

ni'o le bende cu nitcu lo nu gasnu so'u da poi na nu denpa .i la .raitcel. cu gidva lo pu se jitro tu'a lo bartu gi'e dunda lo judri karda po la nicte cadzu .e lo certu menli mikce gi'e cpedu lo nu le se jitro cu denpa lo nu lo pulji cu klama .i ry ba zu lo mentu be li re no cu tolcliva le kumfa fi'o se bevri pa jukni poi dunda ke'a cy .i cy mutce cisma gi'e cusku lu doi .axmed. ko punji le ti malkalci lo nenri be le djine poi mi pu za jarco to'i .a bu gasnu toi .i mi mutce gleki lo nu mi viska le djine kei mu'i lo nu le ti djine cu tutci lo nu vitke lo munje be lo ba'e ba'e sepli fekcrida li'u

ni'o ze'a denpa fi lo nu ro se bende cu spaji catlu la .stefen. .i ba bo la .axmed. co'a cladu cmila .i so'o se bende cu cmila .i ku'i .a bu cmila fi'o se dukse lo ka cladu .i se mu'i bo sy terpa lo nu .a bu ri xrani .i pu bo le jitro ca lo nu binxo co nenri le djine cu co'a klaku gi'e pikci .i ku'i ro se bende cu toljundi jy .i sy pensi lo du'u ta'i ma kau da kakne lo nu mipri lebna fi la ralju fekcrida .i le menli jmive cu cusku lu ju'o le fekcrida cu menli vitke lo blupinxe .i se ni'i bo sipna .i ku'i kakne lo nu za'i cikna binxo ca lo nu menli vitke lo blupinxe .i la'a la .stefen. gasnu lo nu cikna binxo li'u

ni'o cy cmalu porpi le djine gi'e punji lo skori le kuspe be le porpi diklo se ri'a lo nu le djine cu mulno simlu .i cy punji ro jukni fekcrida lo nenri be le djine .i cy dunda lo darno po le skori .a bu poi ca'o smaji cisma .i cy punji lo cmalu jadni lo sruri be le cnebo be le jitro gi'e smaji cusku da se ri'a lo nu le jadni cu te gusni .i ji'a le gusni cu masno zenba .i le jitro cu tcetce cladu pikci .i ku'i cy cusku lu ko vitke la cortu munje .i .a'o ko to'e nelci la'e di'u li'u le jitro bau la .gliban. gi'e tcetce cladu cusku lu mi benji lo se dunda li'u bau la .lojban. .i se ri'a bo le djine cu vasru lo manku po'o .i cy smaji cusku lo'u doi amxed ko lapc le'u gi'e tolsanji binxo .i ry kurji jgari cy .i ca bo .a bu lacpu lo skori .i lo manku cu canci ja'e lo nu le djine cu kunti .i .a bu ca'o barda cisma

ni'o ci pi ci mo'o nu citka

.i sy zutse ragve pa jubme la .stefen. .i ro le se bende cu ji'a jibni .i sy se spaji ke viska catlu cy .i la .deivid. cmila cusku lu ko ga'orgau le moklu doi .susan. .i do pu djuno lo nu lo blupinxe cu citka lo barda li'u ju'e lu .ie sai ku'i mi pu no roi viska lo nu pa remna cu citka pi ro lo pa makcu bakni li'u .i cy cusku lu va'o la'e di'u xamgu fa lo nu mi na remna .i xu do tugni li'u .i vy cusku lu cy krici lo du'u lo blupinxe cu na jutsi mintu lo remna li'u .i sy cusku lu .y. xu da panzi pa blupinxe joi pa remna li'u .i sy se spaji lo nu ro jibni prenu cu se spaji catlu ba'e vy noi kandi binxo di'o le flira .i vy cusku lu .y. .u'u cai lo blupinxe cu ba'e na kakne lo nu se panzi .i xu mi to'e morji lo nu ciksi la'e di'u do li'u ju'e lu do pu go'i li'u

ni'o ro jibni prenu cu ca co'a cusku .i ku'i sy sinxa gasnu lo nu djica lo smaji .i se ki'u bo le jmive cu cusku lu za'a ji'a no da ciksi lo du'u mi kakne lo nu cliva .i ca la'e di'u do fadni remna binxo .i ku'i lo blupinxe cu ka'e jmive ze'u lo nanca be li so'o no no .i lo nu mi cliva ba lo nanca be li du'e cu rinka lo nu do mrobi'o li'u .i sy tavla cusku lu le jmive cu ciksi so'u da poi do'o pu na ciksi .i mi na fengu .i mi smadi lo du'u lo blupinxe cu na temci zifre lo nu kurji lo panzi .i ji'a mi pu na mutce djica ri .i ko surla binxo li'u .i vy cusku lu .u'u cai mi gleki lo nu do na fengu .i ku'i mi pu xenru lo nu mi fliba tu'a do li'u .i sy jgari le xance be vy gi'e cusku lu na nabmi .i ro prenu cu so'i roi srera li'u

ni'o sy troci lo nu xajmi cusku .i sy cusku lu doi cy do pu citka lo xadba be le bakni po'o ze'a lo pu mentu be li ji'i pa no .i mutce masno .i xu do nitcu lo nu mi sidju do li'u .i cy fengu to ku'i xajmi toi cmoni gi'e cusku lu lo nu da'i do citka lo spisa be ti cu rinka lo nu mi gasnu lo nu le do xance cu sepli le do xadni li'u .i ro jibni cu milxe cmila .i sy cusku lu ma mukti lo nu do brabra citka li'u .i ry cusku lu xu do morji le blupinxe ritli li'u ju'e lu li'a sai go'i li'u ju'e lu cy ca le ritli cu benji do lo drata munje ze'a lo cacra be li ji'i pi mu .i ku'i cy pu za benji le malkalci lo drata munje ze'i lo ba'e mentu be li ji'i pi mu .i la'e di'u mutce nandu li'a sai li'u

ni'o ba za bo sy co'a krici lo nu cy ba snada lo nu citka pi ro le bakni .i sy manci lo tadji be lo nu cy citka da poi zmadu cy lo ka barda .i ca bo cy ze'a nalzva se ka'a le festi kumfa se cu'u lu mi nitcu lo nu vimcu pi so'i da pu lo nu mi spoja .i sy cusku lu xu le xadni be cy cupra lo kalci ze'i lo mentu be li me'i ci no li'u .i vy cusku lu go'i .i la'e de'u cu rirci .i ku'i lo jursa cu so'e roi rinka li'u .i sy cusku lu .ii sai ni'o sai .y. .a'o nai ma mukti lo nu le .y. na'e se denci ninmu cu simlu lo ka cinse nelci gi'e klaku fi lo nu na sakci li'u .i ry mutce smaji cusku lu la jukni cu kakne lo nu rinka lo nu tolcro li'u .i sy mutce terpa la'e di'u

ni'o sy cusku lu le jitro cu lifri ma li'u .i cy cusku lu la'a le ralju fekcrida cu rinka lo nu jy tcetce cortu ze'u lo djedi be li so'o no no .i la fekcrida cu kakne lo nu pilno lo makfa lo nu jmive tcena li'u

ni'o ro da poi sy pu zi tirna cu mukti lo nu sy ze'u pensi je smaji .i ba bo sy sipna .i ta'o la .ctefen. snada lo nu pi ro mei citka